Os socialistas tamén presentaron alegacións ao parque eólico de Monteagudo pola súa afección ao apreciado entorno natural de Caión e inclúen a petición da retirada definitiva dos proxectos pola incompatibilidade cos valores ambientais, patrimoniais e paisaxísticos presentes na súa área de afección e a falla de licencia social
Poligonal Pedra Queimada
Os socialistas de Arteixo veñen de presentar diante da Vicepresidencia segunda e Consellería de Economía, Empresa e Innovación as súas alegacións ao proxecto do parque eólico de Pedra Queimada pedindo e a súa retirada definitiva pola súa incompatibilidade cos valores ambientais, patrimoniais e paisaxísticos presentes na área de afección do proxecto e a falla de licencia social.
No documento de alegacións, os socialistas solicitan que se sometan a exposición pública de forma conxunta a documentación ambiental do proxecto do parque eólico Pedra Queimada, nos concellos de Arteixo, A Laracha e Carballo e do proxecto do parque eólico Monteagudo, xa que comparten infraestruturas comúns, ámbito xeográfico e promotora (Acciona).
Outras das alegacións ao proxecto refírense a afección severa e prexuizos irreversibles para as Áreas de Interés Paisaxístico sobre todo nun entorno tan apreciado como o de Caión, tanto no seu porto, o paseo marítimos, as praias ou a capela dos Milagres, entre outros, ao que hai que engadir a afección severa ás familias que viven, residen ou traballan nos núcleos rurais afectados como o de A Cachada en Monteagudo, con impacto sobre a saúde humana.
O PSdeG-PSOE de Arteixo insta a someter a exposición pública a documentación ambiental do proxecto eólico no seu conxunto, incluída a liña de evacuación e demais infraestruturas asociadas de conexión, para non diluír ou reducir os impactos do conxunto e así facilitar a participación da cidadanía na análise dos impactos globais, sobre todo cara a analizar o impacto paisaxístico e garantir a existencia de corredores ecolóxicos.
Tralo estudo en profundidade do proxecto, o Grupo Municipal Socialista considera que se incumpren normativas europeas, españolas e galegas xerando indefensión na cidadanía.
Zona de Caión afectada polo parque eólico de Pedra Queimada.
