O PSOE cualifica de "escusa impresentable" que o Concello culpe aos clubs da cancelación do torneo de Chave no Apóstolo

Os socialistas censuran ao goberno local por dicir no Pleno que "os clubs non se puxeron en contacto", tras 30 anos de torneo organizado polo propio Municipio.

O Grupo Municipal Socialista de Arteixo amosou a súa "estupefacción" ante as explicacións ofrecidas polo Executivo do Partido Popular no Pleno ordinario para xustificar a cancelación do Torneo de Chave Santiago Apóstolo. A formación liderada por Martín Seco tildou de "escusa impresentable" a resposta da concelleira  Inés Ramos quen afirmou que a proba non se celebrara porque "os clubs non se puxeron en contacto co Concello".

Dende o PSOE consideran "indecoroso" que o executivo de Carlos Calvelo pretenda eludir a súa responsabilidade e pasarlle a carga de traballo e a culpa ás entidades deportivas tradicionais do municipio.

O voceiro socialista lembrou que o Campionato de Chave do Apóstolo suma máis de 30 edicións de historia como un evento organizado e financiado directamente polo Concello de Arteixo no marco das festas patronais.

"Pretender que agora sexan os veciños e os clubs de chave quen teñan que ir á Casa do Concello a pedir por favor que se organice unha proba que leva trinta anos no programa oficial é a proba evidente da parálise, a desidia e a falta de xestión do PP", denuncian dende a formación socialista.

A maiores, o PSOE salienta a incoherencia do argumento municipal: se a responsabilidade fose da falta de contacto, o Concello non tería eliminado de golpe toda a programación deportiva das festas patronais deste ano, unha decisión tomada de forma unilateral dende os despachos do goberno local.

"A resposta da concelleira no Pleno é unha falta de respecto á intelixencia da veciñanza. Despois de máis de tres décadas organizando o torneo dende o Concello, a escusa para tapar a súa falla de traballo é dicir que os clubs non chamaron á porta? O traballo dunha concellaría de Deportes é dinamizar, chamar aos clubs e coordinar os torneos, non sentarse a esperar mentres se cargan as nosas tradicións. É lamentable que os clubs de Suevos e Pastoriza teñan que darlle unha lección de dignidade á concelleira organizando un partido pola súa conta", sentenciou Martín Seco.

Esixencia de compromiso para 2027

Diante da "falta de argumentos" amosada polo PP na sesión plenaria, o Grupo Socialista esixe o compromiso de que o torneo de chave será recuperado, financiado e promocionado pola administración local no vindeiro exercicio de 2027, garantindo o apoio institucional que merece este deporte tradicional.