O PSOE de Arteixo alerta da deriva de SUMARTE e acusa ao PP de convertela nun chiringuito político
Os socialistas denuncian cambios nos estatutos para duplicar a xestión do lixo sen medios nin persoal e advirten do anuncio de privatización da recollida de residuos polo capricho do alcalde
José Manuel Álvarez-Campana, gerente de SUMARTE / CARLOS PARDELLAS
O Grupo Municipal Socialista de Arteixo denuncia o descontrol ao que o Partido Popular ten sometida á empresa pública SUMARTE, logo da aprobación —cos votos do PP e o rexeitamento dos socialistas— dun cambio de estatutos que duplica a xestión do lixo sen ningunha planificación nin explicación convincente.
Segundo o voceiro socialista, Martín Seco, “unha empresa pública que naceu para dar un servizo á cidadanía con eficacia e proximidade, estase a converter nun auténtico caixón desastre pola incapacidade da súa xerencia e a falta de vontade do goberno local do PP para estruturar e organizar o persoal”.
Os socialistas critican que os seus representantes non reciben información suficiente nin participan nas decisións estratéxicas, mentres a dirección de SUMARTE renuncia a utilizar os canles de negociación cos traballadores/as. Ademais, lembran que a empresa acumula unha infracción grave da Inspección de Traballo pola xornada laboral irregular do persoal de augas, sen que se aplicasen medidas correctoras.
Por outra banda, Seco subliña que o alcalde “prefire anunciar unha futura privatización parcial da recollida do lixo e deixar outra parte en mans de SUMARTE, que a día de hoxe non conta nin con persoal nin con medios para facelo”. Para o PSOE, isto supón un paso atrás na xestión pública dos servizos e unha mostra máis da falta de planificación e diálogo co persoal municipal.
O Grupo Socialista insiste en que SUMARTE debe centrarse en consolidar unha boa xestión dos servizos que xa ten asignados —auga e limpeza viaria—, garantir condicións laborais dignas e igualdade de oportunidades na bolsa de emprego, e só entón avanzar cara a novos servizos como a recollida de residuos ou mesmo a xestión do Servizo de Axuda no Fogar, que acumula demasiadas experiencias negativas baixo concesión privada.
