O PSOE de Arteixo denuncia a falta de médicos de atención primaria nos centros de saúde do concello

Os socialistas reclaman ao goberno local que esixa á Xunta cubrir as prazas vacantes para garantir unha atención sanitaria digna á veciñanza

O Grupo Municipal Socialista de Arteixo alerta dunha situación insostible nos centros de saúde do concello pola falta de profesionais de atención primaria durante todo o verán.

Martín Seco, portavoz do grupo socialista arteixán, argumento que segundo trasladan numerosos veciños e veciñas, “é practicamente imposible conseguir unha cita co médico de familia a través da aplicación do SERGAS, xa que non hai datas dispoñibles ou hai que agardar ata mediados de setembro para ser atendido”.

Seco explica que o problema chegou ao límite no centro de saúde de Vilarrodís, “que estivo sen ningún médico durante varios días do mes de agosto”, o que ocasionou graves dificultades para os pacientes que, incluso, nalgún caso non podían renovar a súa baixa laboral.

O voceiro socialista lembra que “ano tras ano repítese esta situación pola falta de aposta do PP pola sanidade pública, que se agrava nos meses de verán pola ausencia de planificación e cobertura de prazas”. “Non podemos aceptar que conseguir unha cita médica sexa unha misión imposible en pleno 2025. A saúde da nosa veciñanza non pode quedar desatendida cada verán”, denuncia Martín Seco.

Por todo isto, o Grupo Socialista instou en pleno ao goberno local que esixa á Consellería de Sanidade cubrir de inmediato as prazas de médicos de atención primaria necesarias para garantir unha atención sanitaria digna nos centros de saúde de Arteixo.