Os socialistas de Arteixo piden acondicionar os novos aparcadoiros públicos de Sinforiano López e Travesía da Avenida de Fisterra
Os socialistas de Arteixo piden acondicionar os novos aparcadoiros públicos de Sinforiano López e Travesía da Avenida de Fisterra
Fonte: Concello de Arteixo
O Grupo Municipal Socialista de Arteixo vén de presentar un rogo no último pleno municipal co obxectivo de que o goberno local actúe con urxencia para mellorar o estado das novas zonas de aparcadoiro público situadas nas rúas Sinforiano López e Travesía da Avenida de Fisterra.
O portavoz do grupo municipal socialista, Martín Seco, explica que no pleno de decembro de 2023, “o noso grupo xa alertara da situación de abandono e falta de seguridade que presentaba o ámbito entre Sinforiano López e Guerra da Independencia, con vehículos aparcados nun solar sen as condicións axeitadas”. Naquel momento, os socialistas preguntaron en pleno pola posibilidade de cesión das parcelas para uso público, pero a resposta do concelleiro de Urbanismo foi que “esa non era a solución”.
“Un ano e medio despois desa resposta observamos como o propio Concello anuncia nas súas redes sociais a cesión de dúas parcelas para este fin”, sinala con sorpresa Seco e explica que “as fincas foron desbrozadas, mais seguen sen acondicionar” polo que o acceso continúa sendo deficiente e “a zona está exposta á acumulación de terra e lodo”.
Por este motivo, o Grupo Socialista insiste na necesidade de que o goberno local leve a cabo as actuacións necesarias para converter estas parcelas en espazos seguros, accesibles e axeitados para o uso público, garantindo condicións mínimas de seguridade e salubridade para os veciños e veciñas que fan uso delas a diario.
